Киҷее полған пастағы июнь,
Сiлiг чайғының пастағы кӱнi.
Пурунғылар хаҷан-да пу кӱннi
Чахаях пайрамы тiҷеңнер.
Хаҷан-да, иргiде, тiпчелер,
Андағ кибiрлер пар полҷаңнар.
Иң сiлiг хыстарға пу кӱнде
Чахаях пöрiк кизiртчеңнер.
Чазы чалбахтың iстiнде,
Ырлазып, кöглiг чöрҷеңнер.
Ипчi чох ооллар, чазынып,
Хыстар кöрерге килҷеңнер.
Иргi кибiрнi тыңнанып,
Иирлеткем ағас арали.
Тыңох таа таңнастығ кӱн полған!
Прай чир ӱстӱ, кöйген чiли,
Хызарып, чарып сусталған!
Чалыннығ öртнең час пулуттар,
Тимiр iзiткен кöстер чiли,
Тигiрнең чирнi öртееннер.
Прай даа тастар, ағастар, суғлар
Сах iдöк хада öңненгеннер.
Аннаң айланып, килчедiп,
Чалғыс чахаях кöр салдым.
Чалғыс позыңны кöр салып,
Тыңох таа таңнадым, хайраным,
Харах чазынҷа арығ салымың
Хыйын пас партыр пазыңны.
Пiр дее хомзынма, чахаяғым,
Чалғызан хаҷан даа полбассың.
Пурунғыларның кибiрiнең
Хызымның пазын хоостирбын.
Алғапчам синi чайғы кӱннең!
Арғыс мин саға табарбын.
Аннаңох хости пӱр кистiнде
Сағааны аның öс килтiр.
Iстi-чуреемнең сағынзам,
Чуртаста андағох поладыр.
Чахаяхтарны пiрге тудып,
Чӱреем хыринда хазадым.
Хызымның сомын чазап алып,
Тыңох таа кöглiг айландым.
Автор публикации
