Сӧстері Антонида Томочаковани, кӧӧ Герман Танбаевти
Чиит тус ойнапча чӱреемде,
Пазымда путхалча сағыстар.
Пос чуртастың тоозылбас идеенде
Табырах ирт парарлар чыллар.
Ыр хозымы:
Чиит тузым, чылдаң чылға ӧңненіп,
Салыхпин чӱреемде чуртазын.
Иң хынығ тустарынңа ал чӧріп,
Хыйалға ла мині пирбезін.
Хайдар пазох маңзырапчам
Пӱӱнгі кӱн ирт парза айланмас.
Чиит чӱрек талбыразын тыңнапчам
Соонаң ол піди талбырабас.
Чуртас иң сіліг ӧңнерін
Чиит туста мин сизін халарбын,
Аның ундулбас хынығ кӱннерін
Сағызымда ла артызарбын.